Interi është ekipi i parë gjysmëfinalist i Kupës së Italisë. Skuadra zikaltër ka mundur sot me shifrat 2-0 Romën në sfidën e luajtur në “San Siro”.
Një duel i cili nisi menjëherë nën shenjën e skuadrës së Inzagit që gjeti golin që në minutën e 2-të me anë të Xhekos. Një gol i rëndë për sulmuesin i cili bëri më të thjeshtë sfidën për ekipin e tij që e kishte të lehtë të administronte manovrën, edhe pse 20 minutat e parë të sfidës ishin shumë të ndezur me raste nga të dy palët.
Starti i pjesës së dytë ishte më i mirë për Romën që provoi të rrezikonte disa herë para Handanoviç. Por zikaltrit goditën përsëri me të zakonshmin Sançez e kështu vunë në hipotekë kualifikimin e mëtejshëm në këtë turne.
