Mateo Kovaçiç, lojtari më i mirë i gjysmëfinales Çelsi-Al-Hilal, kërkon trofeun kundër Palmeirasit të shtunën, i cili do të ishte sigurisht i pari për Çelsin, por i treti në karrierën e mesfushorit kroat, i cili e ka fituar dy herë atë me Realin e Madridit.
Kovaçiç e ngriti trofeun në Japoni në vitin 2016 dhe e mbrojti atë një vit më pas në Abu Dhabi, ku po zhvillohet edhe turneu i këtij sezoni.
“Unë kam pasur fatin të luaj dy herë në Botërorin e Klubeve dhe është një eksperiencë e bukur, sepse nuk është e lehtë të vish këtu, por duhet të fitosh Ligën e Kampioneve, i cili është kompeticioni më i vështirë. Moti dhe qyteti i Abu Dhabit janë shumë të bukur, por ne kemi ardhur për të luajtur futboll dhe duam të fitojmë kompeticionin”, tha 27-vjeçari.
“Sigurisht që do të jetë e vështirë. Duhet të jemi të përgatitur. Për klubin e Çelsit çdo trofe është i rëndësishëm dhe motivimi është shumë i lartë”.
