Partizani fitoi ndaj Dinamos dhe vijoi të jetë brenda objektivit për të fituar Kupën e Shqipërisë, e cila do të mundësonte kualifikimin në Europë dhe prestigjin që të jep fitimi i një trofeu në fund të sezonit.
Derbi pa dyshim ishte triumf i madh, por gjithçka e ka një faturë në fund.
Heroi i ndeshjes, Xhuliano Skuka, nuk luajti dot më shumë se 68 minuta në derbi për shkak të problemeve muskulore.
I riu ka pasur probleme edhe gjatë javës, teksa duket se ende nuk janë zhdukur.
Skuadra ditën e djeshme nuk ka kryer një stërvitje të mirëfilltë, por lojtarët i janë nënshtruar një faze rehabilitimi për të ulur ngarkesën muskulore të shkaktuar nga ndeshja e djeshme.
I vetmi që ka munguar ishte pikërisht Skuka, i cili është në dyshim për ndeshjen me Skënderbeun, e cila luhet vetëm pas dy ditësh.
Ndërkohë, Hadroj, i cili la fushën gjithashtu mes dhimbjesh prej problemeve fizike, është në gjendje optimale dhe gati për të luajtur në betejën ndaj Skënderbeut.
Ditën e sotme pritet të nisin zyrtarisht përgatitjet për transfertën në Korçë, e vlefshme për javën e 20-të të Superiores.
