Administratori i deleguar i Milan, Marco Fassone, ka folur për “Milan TV” në përfundim të ndeshjes së fituar 3-1 nga kuqezinjtë kundër Chievo-s në kampionat. Një sukses ky që e mban skuadrën në garë për vendin e katërt.
“Jemi shumë të kënaqur. Po të mos kishim fituar sot, ekipi do të kishte pësuar një goditje në aspektin psikologjik, por fatmirësisht kemi ruajtur ritmin e skuadrave që kemi përpara”, ka thënë drejtuesi kuqezi.
“Derbi me Inter-in? Na vjen keq për datën e derbit, kemi provuar gjithçka. I kemi propozuar zikaltërve dy data të ndryshme, por është zgjedhur e mërkura, një ditë e vështirë. Të enjten, për ndeshjen kundër Arsenal, kanë qenë më shumë se 70 mijë tifozë, por Inter është mbështetur te rregullorja dhe nuk mund të bënim dot asgjë. Kërkojmë falje”.
