Kombëtarja e Shqipërisë po vijon përgatitjet para ndeshjes me Norvegjinë, në resortin “Tropikal”, të Durrësit. Ekipi i drejtuar nga trajneri Christian Panucci po zhvillon stërvitjen e radhës.
Trajneri italian po i jep fund përgatitjeve para takimit me ekipin nordik. Skuadra zbriti e plotë në fushën e kompleksit sportiv, por gjithashtu u konfirmuan dhe largimet dhe afrimet e fundit të lojtarëve.
Mesfushori Sabien Lilaj la grumbullimin e ekipit kombëtar, pasi u dëmtua në stërvitje me skuadrën. Ai i la vend mesfushorit të grumbulluar nga Shpresat, Keidi Bare.
Ky i fundit iu bashkua skuadrës A dhe po zhvillon stërvitje me ekipin A. Lojtari i Atletico Madrid-it u vendos nën urdhrat e trajnerit Panucci. Ky i fundit po tregon se ka një vëmendje të madhe për të rinjtë.
Me grupin po stërvitet dhe mesfushori Eros Grezda. Ai duket se e ka kaluar dëmtimin që kishte dhe po merr ngarkesën e plotë nga trajneri Panucci.
Lojtari i Osijek-ut po lufton për formacionin që do të hedhë trajneri italian për ndeshjen kundër Norvegjisë. Takim ky që do të luhet, më dtaë 26 mars, 19:00, në “Elbasan Arena”.
