Pas barazimit pa gola me Teutën, Luftëtari shkon në ndeshjen ndaj Laçit me një mungesë të rëndësishme në formacion. Trajneri Hasan Lika nuk ka në dispozicion mesfushorin shkodran Behar Ramadani, i cili ndaj djemve të detit plotësoi numrin e 4 kartonëve të verdhë.
Një mungesë që pritet të ndjehet në mesfushë për vetë karakteristikat që zotëron 28-vjeçari, i fortë fizikisht dhe tepër agresiv në topin e parë. Megjithatë për trajnerin kryeqyteas të zikaltërve nuk ka vetëm lajme të këqija, pasi vijnë edhe ato të mira. Kapiteni Orjad Beqiri ka braktisur infermierinë për t’u bashkuar me grupin e futbollistëve, nën urdhrat e trajnerit, duke shtuar alternativat në dispozicion të tij.
Pak ditë përpara ndeshjes me Laçin, dilemat për të vendosur rreth formacionit janë në kokën e trajnerit Lika, pasi alternativë e drejtpërdrejtë e mesfushorit shkodran është braziliani Marco Aurelio, por nuk përjashtohet mundësia e një spostimi të Oltion Rapajt në mesfushë, për t’i lënë vendin kapitenit Beqiri në qendër të mbrojtjes.
Pjesa tjetër e skuadrës së Luftëtarit është e konfirmuar dhe sigurisht që ky është lajmi më i mirë në Gjirokastër, që në sprintin final të sezonit infermieria është e boshatisur, me konkurrencën për një vend titullari që karakterizon grupin e futbollistëve. Suksesi në fundjavë afron akoma më shumë me Europën gjirokastritët, që shpresojnë të shijojnë verën ndryshe nga herët e tjera, me debutimin absolut në kompeticionet e UEFA-s