Ander Herrera, e ka festuar kualifikimin e Manchester United në finalen e FA Cup me familjen e tij në Disneyland. Mesfushori spanjoll shënoi golin e fitores në gjysmëfinale ndaj Tottenham në “Wembley”, të shtunën. “Djajtë e kuq” siguruan biletën për në finalen e 19 majit, falë golit të 28-vjeçarit.’
Spanjolli ka shfrytëzuar kohën e lirë për të shijuar “magjinë” e Disneyland në kryeqytetin francez, së bashku me bashkëshorten, Isabel Collado dhe vajzën e tij. Në fotot e postuara në rrjetet sociale nga momentet argëtuese në Paris, Herrera dukej tejet i lumtur me familjen e tij. Ai nuk është i vetmi lojtar që është larguar nga Manchester për pak kohë pushimi. Victor Lindelof dhe Daley Blind kanë udhëtuar drejt Barcelonës dhe Amsterdamit, ndërsa Jesse Lingard dhe Eric Bailly kanë preferuar që të shëtisin në kryeqytetin anglez, Londër.
Mourinho ka punë të madhe përpara, pasi duhet të përgatisë djemtë për ndeshjen e të dielës ndaj Arsenal.
