Autori i 12 golave këtë kampionat ka qenë rregullisht në fushë në 31 javët e luajtura, madje për koiçidencë ka ardhur nga stoli një herë të vetme, pikërisht ndaj Kamzës në shtëpi, kur Luftëtari u mund 1-2. Pjesa tjetër e ndeshjeve kanë parë Abazajn të aktivizohet si titullar i padiskutueshëm, duke marrë dhe statusin e yllit te skuadrës.
Sigurisht që kjo është një mungesë e rëndësishme por timonieri i zikaltërve mund të buzëqeshë për faktin që me grupin ka edhe rikthime. Vasil Shkurtaj ka lënë pas dëmtimin e pësuar që nga transferta e fazës së 3-të me Flamurtarin dhe tashmë është gati të japë ndihmën e tij për Luftëtarin në konfirmimin e vendit të 3-të.
Prezenca e tij në fushë që nga minuta e parë nuk vihet në diskutim, për më tepër që duhet mbuluar boshllëku i krijuar nga skualifikimi i Abazajt. Lajm tjetër i mirë është edhe rikuperimi i plotë i kapitenit Orjad Beqiri, i cili është i gatshëm të rikthehet në pozicionin e tij, edhe pse Oltion Rapa ka bërë paraqitje të shkëlqyera në mungesë të kapitenit.
