Ekipi i Vllaznisë, pasditen e së premtes ka nisur përgatitjet për ndeshjen e radhës, daj Partizanit, që do ta luajë të dielën, në orën 17:00, në “Selman Stermasi”, pa tifozë. Përpara fillimit të kësaj seance është zhvilluar një analizë e shkurtër me ekipin, teksa para futbollistëve ka folur fillimisht trajneri Gjoka dhe më pas administratori Gjyrezi.
Të dy ata nuk kanë dashur t’i kushtojnë shumë rëndësi asaj çfarë ka kaluar dhe situatës së krijuar pas barazimit me Kamzën, por kanë kërkuar nga sportistët angazhim maksimal për pjesën e mbetur të kampionatit. Pavarësisht se në pamje të parë gjithçka duket shumë e vështirë, edhe në radhët e futbollistëve është vërejtur besimi se mund t’ia dalin.
Administratori dhe trajneri u kanë kërkuar atyre të fokusohen maksimalisht për ndeshjen me Partizanin dhe të mos mendojnë për më tej. Ndaj të kuqve kryeqytetas patjetër duhet synuar marrja e fitores, sepse çdo rezultat tjetër i minimizon maksimalisht shanset e mbijetesës në Superiore.
