Gazetari italian, Livio Varriale, e tha me siguri që Elseid Hysaj do të shkojë te PSG-ja në merkaton e verës dhe francezët do të paguajnë 30 milionë euro për kartonin e tij. Diçka që duket deri diku e pabesueshme për faktin se Napoli i ka vënë klauzolë mbrojtësit shkodran dhe nuk e lë të lirë pa 50 milionë euro.
Dhe në këtë rast përfiton Çelsi, që është gati të paguajë 40 milionë paund për mbrojtësin e Kombëtares shqiptare: 45 milionë euro. Shifër që i afrohet më shumë vlerës së klauzolës së tij. Por në fakt, e ardhmja e tij është e lidhur ngushtësisht me atë të trajnerit Mauricio Sarri. Këtë gjë e ka thënë agjenti i Hysajt, i cili pranon se në rast të largimit të trajnerit, atëherë shqiptari nuk do të ishte shumë i sigurt për të vazhduar më te Napoli. Ai ka folur ditën e djeshme për ecurinë e Napolit.
“Disa ndeshje nuk kanë qenë ashtu siç duhet, por pas Inter-Juve sigurisht që u ndiem keq për shkak të episodeve. Juventusi është një skuadër shumë e fortë, por edhe ne treguam që nuk jemi shumë larg. Nëse qëndrojmë të gjithë këtu do të bëjmë një kampionat tjetër të shkëlqyer”, tha Hysaj.
