Presidenti i Paris Saint-Germainit, Nasser Al-Khelaifi, i ka ndezur spekulimet për largimin e mundshëm të Neymarit në verë duke theksuar se asgjë dhe askush nuk është më i madh se klubi.
Neymari e ka kaluar vetëm një sezon me kampionin e Francës, PSG-në, dhe tashmë lidhet me një largim nga kryeqyteti francez, me shumë gjasë në drejtim te rivalit të ish-klubit të tij Barcelonës, Real Madridi, transmeton Gazeta Express.
Manchester United raportohet të jetë shumë i interesuar për Neymarin, po ashtu, i cili verën e kaluar u transferua në PSG për një shumë rekord botëror në vlerë 222 milionë euro.
Edhe pse Al-Khelafi tha ditë më parë se Neymari do të jetë lojtarë i PSG-së edhe sezonin e ardhshëm 2000 për qind, mbrëmë theksoi se nuk do ta ndalonte askënd që dëshiron të largohet.
“Asgjë dhe askush nuk është më i madh se klubi, as trajneri e as lojtarët”, ka thënë Al-Khelaifi për L’Equipe.
“Klubi është dhe gjithmonë do të jetë i pari, është më i madhi. Nëse dikush s’e pranon këtë dhe nuk është i lumtur, mund të largohet”, shtoi ai.
