Arsene Wenger do të vendosë të ardhmen e tij gjatë dy javëve të ardhshme, duke marrë shkas edhe nga interesimi i Real Madrid. Trajneri francez aktualisht po konsideron të gjitha opsionet e tij, pasi përmbylli 22 vite mbretërim te Arsenal.
Tekniku 68-vjeçar konsiderohet si më favoriti i kompanive të basteve, për të marrë drejtimin e Real Madrid, pas largimit të papritur të Zinedine Zidane nga Bernabeu. Ai është përfolur gjithashtu edhe për një vend në rolin e drejtorit të futbollit në klubin gjigant të Ligue 1, PSG.
Vetë Wenger në një intervistë për ‘French TV’, deklaroi: “Është një pyetje për të cilën do të duhet të përgjigjem brenda 15 ditëve të ardhshme. Po, unë dua akoma të jem trajner. A kam akoma dëshirën që të përfshihem në ndonjë sfidë absolutisht të çmendur?”
“Është një punë që kërkon përkushtim total. Duhet të shkëputem pak, çka nuk e kam bërë kurrë, për të parë se sa shumë më mungon të jem trajner. Si do t’ja dal pa adrenalinën që ka puna ime… dhe ekseriencën e ndarjes së emocioneve me të tjerët”.
