Barcelona ka pranuar që duhet të përgatitet për të shmangur largimet e talenteve që ka në akademi, sidomos në moshën 16-vjeçare, kur firmosin kontratë profesionale. Kështu, drejtuesit e klubit kanë krijuar një formulë të re për të kompensuar futbollistët që mbeten në “Camp Nou”, përkundër ofertave joshëse ekonomike që vijnë nga Anglia, Gjermania apo Italia.
Klubi blaugran e ka kuptuar strategjinë e ekipeve të huaja për të tërhequr talentet e rinj dhe ka nisur punën për t’i bindur ata që të qëndrojnë në Katalonjë. Në disa raste specifike, lojtarëve që kanë marrë propozime të rëndësishme nga jashtë, u ofrojnë një bonos të veçantë kur arrijnë te Barça B. Në kontratën e tyre të parë profesionale, caktohet një shumë shtesë financiare e besnikërisë që i kompenson ato në mënyrë të konsiderueshme për kohë që kanë qëndruar në Barcelonë.
Klubi katalanas i paguan gjithashtu një shumë të konsiderueshme në kontratën e parë kur nënshkruajnë, për të shmangur ikjen e tyre. Në këtë mënyrë do të investojë për ekipin e dytë. Aktualisht lojtarët kanë një klauzolë prej 100 milionë euro nëse duan të largohen e të nënshkruajnë për ekipe të tjera.