Rënia poshtë e pistës “Griezmann”, i cili do të mbetet tek Atletico Madrid, ka bërë që Barcelona të ndryshojë kurs në tregun e transferimeve të kësaj vere. Sipas “El Mundo Deportivo”, në fakt, Blaugranët e kanë fokusuar emrin e Miralem Pjanic si prioritet për mesfushën.
Mesfushori boshnjak është mirë në Torino dhe Juventusi dëshiron ta mbajë atë, synon ta rinovojë kontratën e tij, por katalanasit, të cilët kanë për të gjetur një zëvendësues për Iniesta, kanë nisur të interesohen konkretisht për të.
Kontakti i parë mes klubit dhe lojtarit boshnjak thuhet se ka ndodhur me një mesazh, me të cilin Barcelona e ka njoftuar interesin e saj. Është e qartë se Pjanic është kënaqur me interesin e një klubi të rëndësishëm si Barcelona, por shitja e tij duket e vështirë.
Boshnjaku është me të vërtetë një lojtar kyç në radhët e Juventusit, që vetëm në prani të një oferte “monstër” mund të hapë negociata. Për mbrojtjen, ndërkohë, sipas “El Mundo Deportivo”, Roma do të propozojë për katalanasit kartën “Manolas”, i cili në kontratën e tij ka një klauzolë lirimi prej 38 milionë eurosh.
