Fitorja e Zvicrës ndaj Serbisë gjatë njërës prej ndeshjeve të Botërorit bëri bujë të madhe kur të dy golat i shënuan futbollistët shqiptare, të cilët revoltuan popullin serb duke festuar me shqiponjën me dy duar.
Ata e quajtën fyerje nacionale veprimin e tyre në mes të Serbisë dhe për ditë me radhë mediat serbe kanë shkruar për këtë ngjarje. Së fundmi, njëra prej tyre ka shkruar se festimi i dy shqiptarëve me shqiponjën me dy duar lidhet direkt me serbët, pasi ata e kanë pësuar nga politikat e Beogradit.
Sipas ‘Blic’, babai i Granitit, Ragip Xhaka, ka bërë tre vite në burgjet serbe për pjesëmarrje në demonstratat e viteve ’80-të, ndërsa shtëpia e Shaqirit në Gjilan është djegur e rrafshuar gjatë luftës.
Media serbe ka publikuar edhe foto nga kampi i stërvitjes së skuadrës së Zvicrës, ku dallohet mbështetja e trajnerit të ekipit, Vladimir Petkoviç, për dy lojtarët shqiptarë.
