Neymar u përzgjodh si futbollisti më i mirë në fitoren e Brazilit kundër Meksikës, me rezultatin 2-0 në Samara, duke siguruar një vend në çerekfinalen e Kupës së Botës “Rusi 2018”, falë një goli të realizuar nga numri 10 i verdhëjeshilëve dhe një asisti për Firminho. Por lavdia e fitores dhe kualifikimit nuk i mjaftuan brazilianit Neymar, i cili shënjestroi Meksikën me fjalë të ashpra.
“Meksikanët patën folur shumë dhe për këtë arsye meritojnë të shkojnë në shtëpi”, duke pranuar vështirësinë e ndeshjes: “Brazili duhet të mësojë të vuajë. Kjo ishte një ndeshje shumë e vështirë, për shkak të meritës së kundërshtarit. Jam i lumtur me paraqitjen time, por edhe më shumë me fitoren e skuadrës”, deklaroi Neymar, gjithashtu duke vlerësuar cilësinë e Meksikës.
“Unë kam ardhur në Rusi me një objektiv të vetëm. Për të fituar Kupën e Botës. Erdha të fitoj Kupën e Botës dhe asgjë tjetër. Erdha të luaj futboll dhe të ndihmoj ekipin tim të fitojë, prandaj jam shumë i lumtur me ndeshjen e sotme. Ne po luajmë çdo ndeshje më mirë”, përfundoi Neymar.
