Borja Valero ishte një nga futbollistët e parë që kërkoi Luciano Spalletti pasi erdhi në stolin e Interit verën e kaluar, por kur ka kaluar vetëm një vit, situata ka ndryshuar tashmë.
Mesfushori spanjoll e nisi sezonin si titullar dhe bëri një paraqitje për t’u duartrokitur, por me kalimin e javëve tregoi edhe limitet e tij fizike, duke humbur shkëlqimin.
Kjo bëri që ai të humbte vendin e titullarit dhe thuajse gjatë gjithë fazës së dytë, i nisi takimet nga stoli, pasi nuk ofronte garancitë e duhura për Spallettin.
Pikërisht për këtë arsye Interi është gati të dëgjojë edhe ofertat që vijnë në drejtim të tij, e para prej të cilave ka ardhur pikërisht sot.
Bëhet fjalë për Villarealin, klub spanjoll që i ka ofruar zikaltërve 2 milionë euro, për të blerë kartonin e Borja Valeros dhe mesfushorit i ka ofruar një kontratë 3-vjeçare.
Zikaltrit janë treguar të hapur të negociojnë, por kanë kërkuar nga spanjollët që të rritin ofertën e tyre në të paktën 3 milionë euro, për të mos regjistruar humbje në bilanc.
