I qetë Igli Tare pas njohjes me emrin e kundërshtarit që Lacios do t’i duhet të përballet në 1/16 e Ligës së Europës. Shorti rezervoi për kryeqytetasit rumunët e Steauas së Bukureshtit dhe një kalendar të favorshëm duke qenë se ndeshja e kthimit do të luhet në “Olimpiko” të Romës.
Në një koment për “Sky Sport”, ish-sulmuesi shqiptar ,që aktualisht mbulon rolin e drejtorit sportiv të Lacios, deklaroi: “Sigurisht që Steaua nuk është një rival për t’u nënvlerësuar, por nuk duhet të ankohemi, pasi mund të na shkonte edhe më keq. Ata janë një skuadër me traditë që me siguri dinë të luajnë futboll, megjithatë, të jem i sinqertë, më duhet të pranoj se patëm një dozë të mirë fati”.
