Java e 16 e Serisë A do të mbyllet me takimin e mbrëmjes së sotme, mes Lazios dhe Torinos në ‘Olimpico’. Bardhekaltrit e Inzaghit lanë pas momentin negativ me fitoren me përmbysje në Xhenova ndaj Sampdorias dhe sot do të kërkojnë të marrin një tjetër 3-pikësh për të barazuar Romën në vendin e 4-t të renditjes.
Trajneri Inzaghi pritet të ketë në dispozicion thuajse të gjithë lojtarët, ndërsa krahas fitores, sfida e vërtetë për kryeqytetasit duket se është rikthimi te goli i Ciro Immobiles. Sulmuesi i kombëtares italiane ka shënuar vetëm një gol gjatë muajit nëntor, edhe atë me 11-metërsh ndaj Romës në derbi, ndryshe nga periudha shtator-tetor, ku shënoi plot 14 të tillë.
Përballë Lazios sot do të jetë Torino, një ekip I ndërtuar për të synuar një vend në Europa League, por që me paraqitjen e deritanishme nuk po bind aspak. Skuadra e Mihajloviçit luan mirë me të mëdhatë, por ka lënë shumë pikë me skuadrat e vogla, duke bërë që pas 15 javësh të ketë vetëm 20 pikë në vendin e 12 të renditjes.
Presidenca e klubit ka hedhur dyshime edhe mbi punën e trajnerit Mihajloviç, aq sa mediet italiane raportojnë se një humbje sot në kryeqytet mund të pasohet me shkarkimin e tij nga stoli. Në 2 transfertat e fundit, Torino është përballur me skuadrat e Milanos në ‘San Siro’, ku ia ka dalë t’i rrëmbejë barazimin si Interit, ashtu edhe Milanit, ndërsa do të kërkojë të mos dalë pa pikë edhe sot në ‘Olimpico’.
