Barcelona do të përballet me Valencian në gjysmëfinale të Kupës së Mbretit.
Çifti i tjetër gjysmëfinal do të jetë ndërmjet Legannes dhe Sevillas, pas shortit që u hodh sot në Madrid.
Ndeshjet e para gjysmëfinale do të zhvillohen javën e ardhshme, pra të martën dhe mërkurën, ndërsa ato të kthimit në javën vijuese.
Për të arritur në gjysmëfinale të kupës, Barcelona e eliminoi rivalin e qytetit, Espanyolin, me rezultat të përgjithshëm 2-1 pas dy ndeshjeve. Barça e humbi ndeshjen e parë në udhëtim me rezultat minimal, por mbrëmë shënoi fitore 2-0 në “Camp Nou”, për ta siguruar një vend në gjysmëfinale.
Barcelona e ka arritur gjysmëfinalen e Kupës së Mbretit për vitin e tetë më radhë dhe tani do të synojë ta arrijë finalen e 21 prillit, për ta mbrojtur titullin e fituar vitin e kaluar.
