Idelino Kolubali ishte objektivi i drejtuesve të Kukësit për repartin e avancuar, madje ishin këta të fundit që kanë deklaruar se kishin arritur marrëveshjen me shtatlartin.
Ata theksuan se nga dita në ditë ai do të udhëtojë drejt Shqipërisë, por dokumentacioni po e mbante peng. Gjithsesi u tha se çdo gjë do të zgjidhej, por nuk ndodhi kështu.
Burime të “Panorama Sport” bëjnë me dije se klubi i Boavistës ishte i gatshëm ta lironte lojtarin, por ishte vetë futbollisti që ndërroi mendje për shkak të dokumentacionit.
Kolubali për dy muaj pajiset me pasaportën portugeze dhe kjo gjë e ka shtyrë mos të afrohet në Shqipëri. Ndërmjet pasaportës dhe Kukësit, ai ka zgjedhur pasaportën, ndërsa agjenti i tij u ka kthyer përgjigje negative kampionëve.
PORTUGEZI Presidenti Gjici nuk e ka pritur aspak mirë refuzimin e Kolubalit dhe u ka kërkuar vartësve të tij që të kërkonin për një tjetër sulmues dhe në skenë ka dalë një tjetër portugez.
Bëhet fjalë për Amido Balde, i cili është pjesë e klubit portugez të Maritimos. Balde ka një fizik për t’u admiruar, pasi është plot 1.97 metra dhe luan si sulmues qendre dhe në krahun e djathtë.
Palët kanë arritur akordin në parim dhe trajneri Pakult ka dhënë miratimin e tij. Tashmë mbeten për t’u diskutuar vetëm detajet e kontratës.
Ndërkohë, në garë për shërbimet e Balde është futur edhe skuadra e Skënderbeut.
NIGERIANI Për të qenë të sigurt se në ditët e mbetura të merkatos do të afrojnë një sulmues cilësor, drejtuesit e Kukësit janë në bisedime edhe me një tjetër sulmues.
Uçe Nofor, nigeriani që e ka nisur në nivele të larta karrierën, ka vuajtur nga dëmtimet. 27-vjeçari ka luajtur fillimisht te Venlo në Holandë për 4 sezone, ku në dy të parët ka shkëlqyer.
Pastaj ka kaluar te Herenven, Lierse, në Belgjikë, e së fundmi te Trencin në Sllovaki. Nëse Kukësi nuk do të afrojë Balde, Uçe është alternativa tjetër.
E sigurt është se njëri prej të dyve do të vihet nën urdhrat e trajnerit Pakult. Presidenti Gjici gjithashtu u ka bërë me dije drejtuesve të merkatos se nuk pret më asnjë justifikim dhe duhet që t’i plotësojnë më çdo kusht dëshirat trajnerit.
