Partizani e ka gjobitur dhe “internuar” pas sherrit me trajnerin Sulejman Starova në Turqi, por Lorenc Trashi nuk dorëzohet. Mesfushori nuk mund ta komentojë për mediat ndëshkimin e drejtuesve, pasi prononcimi pa lejen e klubit pas debatit në Antalia, ka pjesën e tij te gjoba e vendosur.
Gjithsesi, përmes profilit të tij në rrjetet sociale, Trashi jep një mesazh për të ardhmen. 25-vjeçari tani shpresën e ka te Zoti dhe nuk do të dorëzohet nga vendimi që ka marrë klubi ndaj tij.
“Mos u dorëzo. Ka shpresë për ty. Zoti do të ndihmojë ty!”, shkruhet në brendësi të fotos së publikuar nga Lorenc Trashi në profilin e tij në “Instagram”.
BASHKËPUNIMI ME STAROVËN – Përveç gjobës monetare, Trashi është dëbuar nga ekipi i parë dhe i duhet për një afat të pacaktuar të përgatitet me Partizanin B.
Ky mbetet një vendim që qarkullon në ambientet e brendshme të klubit, por që është bërë i ditur edhe nga mediat, por i pa konfirmuar nga vetë Partizani.
Gjasat janë të pakta që lojtari ta pranojë këtë “internim”, por nëse nuk e zbaton, masat ndëshkuese mund të përshkallëzohen. Në prononcimin për “Panorama Sport”, një ditë pas sherrit me trajnerin, Trashi e tha qartë që me Starovën e ka mbyllur përfundimisht, duke lënë të kuptohet se nuk do ketë më bashkëjetesë mes palëve, pavarësisht ndëshkimit që do t’i faturohet
. “Gjithsesi, unë personalisht e quaj të mbyllur me Starovën, aspak nuk tërhiqem mbrapa, çfarëdo mase të merret kundrejt meje, si për shembull, një gjobë e majme, unë absolutisht nuk e pranoj, sepse jam me të drejtë dhe s’lejoj njeri ta mohojë këtë gjë. Kur kam qenë gabim, kam qenë unë që i kam kërkuar falje profesorit, por tani jo më. E them hapur, Starova nuk më do në ekip siç ka bërë dhe me disa lojtarë të tjerë që i ka prerë në besë”, kështu u shpreh Trashi për “Panorama Sport” një ditë pas sherrit me “Bobin” në Antalia.
Për momentin, i bie që te Partizani të ketë vend vetëm për njërin, ose Trashin ose trajnerin Starova. Gjithsesi, shpresohet që gjakrat të ulen dhe palët të pajtohen, pasi Partizani nuk dëshiron që ta largojë me parametër zero lojtarin, i cili ka qenë planifikuar për t’u shitur në merkaton e verës.
