Milani ka insistuar se nuk e ka ndërmend të zhvendoset nga stadiumi ikonë “San Siro”, të cilin e ndan me rivalin e qytetit, Interin, pasi kryetari i Komunës së Milanos, Giuseppe Sala, sugjeroi se zhvendosja e Milanit është e pashmangshme.
Megjithatë, këtë e ka hedhur poshtë klubi i Milanit, që i është përgjigjur në këtë mënyrë komenteve të Salas: “Milani thekson se klubi asnjëherë nuk e ka shprehur dëshirën për t’u larguar nga ‘San Siro’”.
Sala tha për Sky Sport Italia se klubi në pronësi të kinezëve po bën përpjekje për ta ndërtuar stadiumin e vet dhe se tashmë kishte diskutuar rreth zonave në qytet që do të ishin të përshtatshme për ndërtimin e tij.
“Milan po mendon për stadium të ri, stadiumin e vet. Ne do t’i japim kohë për të parë nëse ka mundësi, por në fund diçka duhet bërë”, ka thënë Sala.
Por, klubi e ka mohuar se është duke menduar të largohet nga “San Siro” me 80 mijë ulëse, duke thënë se në fakt po e konsideron renovimin e stadiumin ekzistues.
