Antonio Conte ka rikujtuar Jose Mourinho për sjelljen e tij në të shkuarën gjatë karrierës së tij të gjatë.
Trajneri i Manchester United mbrojti sjelljen e tij më të tërhequr të kohëve të fundit, duke insistuar se atij nuk i ka humbur pasioni.
Mourinho akuzoi trajnerin e Chelsea-t se kishte treguar mungesë respekti sezonin e kaluar për shkak të festimeve të italianit në stol.
Por Mourinho në të shkuarën ka qenë po aq i animuar në disa klube. Dhe Conte ishte gati të rikujtonte 54-vjeçarin për bëmat e tij.
“Mendoj se mbase ka qenë duke folur për veten e tij në të shkuarën,” shprehet Conte në prag të raundit të FA Cup ndaj Norwich ditën e shtunë.
“Ndonjëherë njerëzit mund të harrojnë se çfarë kanë bërë në të shkuarën. Është e çuditshme pasi unë nuk dua të flas për trajnerët apo lojtarët që nuk janë te Chelsea.
“Është një formë respekti që duhet ta kesh.”
