Këshilli Britanik i Boksit ka deklaruar sot se është gati t’i japë sërish licensën për boksim Tyson Fury vetëm pasi ky i fundit të ketë kaluar testet mjekësore.
Ish-kampionit të botës në peshat e rënda iu hoq licensa në tetor të vitit 2016, pasi doli pozitiv me kokainë, të cilën boksieri deklaroi se e merrte për shkak të depresionit. Më pas, ai dorëzoi edhe titujt kampionë bote, duke i nxjerrë ato vakant, ndërkohë që nuk ngjitet në ring që prej nëntorit të 2-015-ës, kur mundi me vendim unanim të gjyqtarëve Wladimir Klitschko dhe i mori titujt kampionë bote.
Fury konfirmoi javën e kaluar se kishte aplikuar zyrtarisht pranë Këshillit Britanik të Boksit për të rimarrë licensën, pasi arriti edhe një marrëveshje me antidopingun britanik.
Por Këshilli Britanik i Boksit është treguar më i rreptë, duke i kërkuar boksierit të kalojë disa teste mjekësore, që është rikuperuar fizikisht e psikologjikisht. “Në përfundim të takimit që patëm sot me boksierin Tyson Fury, vendosëm që dhënia e licensës për boksim do të jepet pasi sportisti të marrë një vërtetim mjekësor që është gati për t’u rikthyer në ring”, thuhet në komunikatën e Këshillit Britanik të Boksit.