Dje, më 15 shkurt, ishte 16-vjetori i regjistrimit të parë zyrtar të yllit argjentinas, Leo Messi, si lojtar i Barcelonës. Një datë e shënuar, që do të shënjojë historinë e klubit azulgrana. Nga fillimet e tij, “rosarino” shkëlqeu në kategoritë më të ulëta deri në arritjen e ekipit të parë të Barcelonës, ku, deri në 31 vjeç, tashmë, është lojtari më i mirë i të gjitha kohërave. Një kopje e regjistrimit të parë të “10” së Barçës, pasardhës i Ronaldinho “Gaúcho”, i bërë gjatë sezonit 2001-2002 në Federatën Katalanase të Futbollit, është kthyer në virale gjatë orëve të fundit përmes rrjeteve sociale. Në të duket një foto e Messit të ri, i cili duket serioz para aparatit fotografik, ndërsa pranë imazhit ka disa informacione personale dhe nënshkrimin e tij. Gjatë qëndrimit në “La Masia”, nga Infantil B te Barça B, Leo Messi arriti të nënshkruajë deri në 105 gola në 107 ndeshjet që luajti.
Tashmë, në ekipin e parë, me të cilin debutoi nën komandën e Frank Rijkaard në vitin 2004, ka luajtur një rol të madh në fitimin e katër titujve të Ligës së Kampionëve, pesë Kupave të Mbretit, tetë tituj kampioni në La Liga dhe shtatë Superkupa. Në nivelin individual, argjentinasi ka fituar pesë herë “Topin e Artë” dhe katër herë “Këpucën e Artë”. Aktualisht, Messi udhëheq Barcelonën që aspiron t’i fitojë të gjitha garat. Tashmë, i kualifikuar për në finalen e Kupës së Mbretit, ku do të matet me Sevilla, lider i La Liga-s dhe pjesë e 1/8 finale të Champions-it, Leo Messi vijon të qëndrojë në majë të futbollit botëror. Legjenda e Argjentinës vazhdon mbretërimin edhe 16 vjet pas federimit me klubin katalanas.
