Pierre-Emerick Aubameyang e kurorëzoi me gol debutimin e tij me Arsenal-in në Premier League. Ndërkombëtari gabonez deklaron se ky është vetëm fillimi dhe premton se do të bëjë akoma më shumë për “Topçinjtë”.
Pak ditë më parë 28-vjeçari u transferua për 55 milionë sterlina nga Dortmund-i te klubi i Londrës nga i cili u largua Olivier Giroud te Chelsea (£18m).
Trajneri Arsene Wenger nuk hezitoi, por e përfshiu menjëherë ish-sulmuesin verdhezi në XI-en titullare të “Topçinjve” për sfidën e fituar 5-1 ndaj Everton-it, duke lënë në stol blerjen e verës Alexandre Lacazette (£52m).
“Sigurisht që jam i lumtur. E fituam ndeshjen që në pjesën e parë dhe jemi të gjithë të gëzuar. A do të japë më shumë për skuadrën? Besoj se po”, u shpreh Aubameyang për faqen zyrtare të klubit.
Dy transferimet e dimrit, Aubameyang dhe Mkhitaryan (3 asist) dhuruan një debutim mbresëlënës në “Emirates Stadium” dhe trajneri Wenger mendon se ata ndihen që tani si në shtëpinë e tyre tek Arsenal-i.
“Të dy lojtarët erdhën në janar, por ata duken sikur kanë luajtur gjithmonë me ne, kanë të njëjtën zhdërvjelltësi, të njëjtat aftësi teknike”, u shpreh francezi pas ndeshjes.
Aubameyang mbërriti në Londër pas një fillimi me nivel me Dortmund-in në 2017-18, ku numëron 21 gola në 24 ndeshje në të gjitha kompeticionet.
Megjithatë, kohës së tij me skuadrën gjermane po i vinte fundi me Dortmund-in që e penalizoi gabonezin duke e lënë jashtë formacionit titullar, situatë që e bëri të pashmangshëm transferimin tek Arsenal-i.