Sergio Aguero nuk do të udhëtojë për në Madrid me kombëtaren e Argjentinës për miqësoren që do të luhet të martën kundër Spanjës. Sulmuesi i Manchester City, i cili nuk luajti ndaj Italisë si pasojë e një dëmtimi në gju, nuk do të riaftësohet në kohë për të luajtur në miqësoren e dytë, kësisoj është lënë i lirë nga trajneri Jorge Sampaoli. Ai do të udhëtojë për në Abu Dhabi, ku ndodhet aktualisht skuadra e Manchester City, për të nisur riaftësimin në kujdesin e mjekëve të skuadrës angleze.
Aguero pësoi një goditje në gju, në stërvitjen e fundit me Manchester City, pas fitores 2-0 ndaj Stoke, por ia bashkua shokëve të kombëtares argjentinase me objektivin që të ishte i gatshëm të paktën për ndeshjen ndaj Spanjës, megjithatë nuk ia doli. Trajneri Sampaoli, tha: “Ishim në kontakt me mjekët e City, ata ishte optimistë se lojtari mund të luante disa minuta ndaj Spanjës, por duke monitoruar gjendjen e tij këto ditë vendosëm të mos rrezikojmë.”
