Pavarësisht se trajneri i Borussia Dortmund, Peter Stoger deklaroi se do të ketë nevojë për të punuar shumë, me qëllim që të luajë në nivele të larta, Usain Bolt nuk ka asnjë qëllim që të braktisë ëndrrën e tij.
Ish-atleti xhamajkan, njëherësh njeriu më i shpejtë në planet, pasi përfundoi testin dy-ditor me verdhezinjtë, foli për eksperiencën e tij të re, tashmë në futboll, i sigurtë për t’ja dalë me objektivin e tij.
“Shpresoj të mund të luajë me ekipin e parë të Borussia Dortmund. Nuk jam i mësuar të vrapoj për kaq gjatë, kam bërë gjithmonë vetëm sprint, por bëhet fjalë vetëm për tu mësuar dhe të punoj për të rigjetur formën optimale. Kam nevojë për një sfidë të re. Doja të isha vrapuesi më i mirë dhe të dominoja skenën, tani dua të bëhem futbollist. Më pëlqen të sfidohem dhe besoj se futbolli është zgjedhja e duhur. Moto ime është: ‘Gjithçka është e mundur’”, deklaroi Bolt.
Ndërkohë, pas provës, vetë trajneri i Borussia Dortmund, Peter Stoger, deklaroi: “Bolt? Është gjithçka çështje lëvizjesh dhe aplikimiesh, por e rëndësishmja është që u zbavit. Ëndrra e tij për të luajtur si profesionist? Mendoj se ka talent, por nëse dëshiron të luajë në një nivel të lartë, ka qartësisht shumë punë për të bërë. Fiziku i tij prej atleti, është tërësisht ndryshe nga ai i një futbollisti, por ishte zbavitëse për ne. Ishte një kënaqësi të takoja një djalosh si ai dhe të punoja me atë”.
