Gianluigi Donnarumma është vënë në shënjestrën e Chelseat. Lajmi publikohet në mediet italiane dhe britanike, sipas të cilave klubi londinez po monitoron situatën e portierit 19-vjeçar për të tentuar blerjen e tij, nëse Thibaut Courtois largohet.
Portieri i përfaqësueses belge nuk ka rinovuar ende kontratën me kampionët në fuqi të Anglisë dhe së fundmi emri i tij është lidhur me atë të Realit të Madridit.
Gjithnjë sipas asaj që publikohet në media, agjenti i Donnarummës, Mino Raiola nuk ka prej kohësh raporte të mira me drejtuesit e Milanit, e herë pas here ka dalë me deklarata kontroverse, nëpërmjet të cilave e këshillon “klientin” e tij që të largohet nga kuqezinjtë.
Por Chelsea nuk është i vetmi që ka hedhur sytë nga Gianluigi Donnarumma. Mësohet se edhe Paris Saint Germain ka shfaqur interes për blerjen e kartonit të futbollistit italian.
