Holanda ka treguar se nuk ka marrë fund teksa ka mposhtur pa shumë probleme Portugalinë me rezultatin e pastër 3-0. Ishte një ndeshje e bukur në Stade de Geneve të Gjenevës dhe Holanda shënoi tri herë brenda 45 minutave të para duke mbyllur ndeshjen që në pjesën e parë.
Ishte Depay ai që zhbllokoi rezultatin për holandezët pas një krosi të bukur të de Beek. Pas gjysmë ore lojë Ryan Babel dyfishon rezultatin. Ish-ylli i Liverpool ishte një nga më të mirët në fushë deri në atë moment duke i shkaktuar shumë probleme prapavijës portugeze dhe goli i tij ishte më se i merituar.
Pak sekonda përpara fundit të pjesës së parë kapiteni Van Dijk trefishon rezultatin me një goditje të bukur nga brenda zonës.Një Ronaldo i lënë në hije dhe i vetmi moment që u fokusua nga kamera ishte kur bëri një simulim dhe kërkoi një penallti.Pas pushimit ndeshja nuk ndryshoi, megjithëse portugezët u munduan të rihapnin gjithçka dhe Ronaldo kishte dy mundësi të mira përpara se të zëvendësohej.
Ndeshja praktikisht përfundoi kur Cancelo i Inter del me karton të kuq pas të verdhit të dytë. Një miqësore që ka shërbyer për vetëbesimin e Holandës e cila është në një fazë rinovimi.
