Manchester United është i vendosur të rikthejë interesin e tyre në Blaise Matuidi një vit pasi humbi garën ndaj Juventusit, që nënshkroi me mesfushorin francez. Jose Mourinho ishte i etur për 30-vjeçarin, por “Zonja e Vjetër” u tregua më e shpejtë dhe gjeti marrëveshjen me ish-yllin e Paris Saint-Germain. Italianët nuk duan ta shesin lojtarin, megjithëse “Djajtë e Kuq” kanë qenë në kontakt me agjentin e tij Mino Raiola, shkruan “Rai Sport”.
Me dëmtimin e Paul Pogba, opsionet e Mourinho në mesfushë dukeshin të kufizuara vetëm me Nemanja Matiç dhe të riun Scott McTominay, ndaj Matuidi do të sillte përvojë dhe shpejtësi, sëbashku me një shkathtësi për të operuar në skemën me dy ose tre mesfushorë. Matuidi ka vuajtur nga disa dëmtime, por është një lojtar i rëndësishëm i Juventusit. Javën e kaluar, bardhezinjtë eliminuan Tottenham nga Liga e Kampionëve me një fitore 2-1 në Londër dhe francezi zhvilloi një paraqitje të mirë.
