Milan po monitoron situatën e mesfushorit të Real Madridit, Dani Ceballos, i cili gjithnjë e më shumë ka gjasa të kërkojë të transferohet në një klub tjetër gjatë merkatos së kësaj vere për shkak të mungesës së minutazhit.
Drejtuesit e kuqezinjve Marco Fassone dhe Massimiliano Mirabelli e kanë identifikuar atë si një prej objektivave kryesore, megjithëse aftësia e tyre për të nënshkruar me mesfushorin do të varet shumë nga aftësia e tyre për të respektuar rregullat financiare të UEFA-s.
21-vjeçari është i vendosur të largohet nga “Los Blancos”, pasi e ka kuptuar, se trajneri Zinedine Zidane nuk e ka në planet e tij për formacionin bazë. Në të vërtetë, ai është i hapur për idenë e transferimit në “San Siro” vitin e ardhshëm.
Mirabelli tashmë ka përfunduar marrëveshjet për të sjellë Pepe Reina dhe Ivan Strinić në Lombardia, respektivisht nga Napoli dhe Sampdoria, por tani ka në fokus edhe dy lojtarë me peshë. Presidenti i “Los Blancos” Florentino Pérez ka gjasa të kërkojë 40 milionë euro për ish-yllin e Real Betis. “Djalli” do të jetë në gjendje të përballojë një shpenzim të tillë, për sa kohë që ata nuk kufizohen prej sanksioneve të vendosura nga UEFA.
