Manchester United thuhet se po përgatit një lëvizje për mbrojtësin Joao Cancelo, me Matteo Darmian dhe Luke Shaw që pritet të largohen në merkaton e verës. 23-vjeçari, i cili aktualisht është duke shijuar një moment mjaft të mirë në Inter, në huazim nga Valencia, është shfaqur si një objektiv i mundshëm për portugezin Jose Mourinho. Cancelo ka bërë 19 paraqitje këtë sezon dhe performancat e tij mbresëlënëse në Serie A kanë fituar vëmendje nga e gjithë Evropa.
Interi shpreson të sigurojë një marrëveshje të përhershme me portugezin, por me gjasë do të përballet me konkurrencë të fortë për nënshkrimin e tij. Veçanërisht nga Anglia, ku sipas “Calciomercato.com”, Manchester United po përgatitet për të bërë një ofertë zyrtare. Mourinho dhe Cancelo ndajnë të njëjtin agjent, Jorge Mendes, i cili mund të jetë shumë i rëndësishëm gjatë negociatave. Gjigantët e Premier League gjithashtu kanë burimet financiare për të kënaqur Valencia-n me 30 milionë sterlina për mbrojtësin e krahut.
