Nga dhjetë skuadrat aktuale në Kategorinë Superiore, vetëm tri prej tyre kanë vijuar një projekt me drejtuesit nga sezoni i shkuar. Skënderbeu, Flamurtari dhe Kamza kanë të njëjtin trajner që nga një vit më parë.
Ilir Daja, pasi mbylli edicionin e shkuar në Superiore me korçarët, nisi përgatitjet për Europën dhe arriti me sukses kualifikimin në fazën e grupeve dhe gjithashtu drejtoi korçarët me rezultate pozitive në Europa Ligë.
Shpëtim Duro u ul në stolin e Flamurtarit në edicionin e shkuar dhe mori besim prej drejtuesve për të qenë në krye të vlonjatëve edhe për këtë edicion.
Ramadan Ndreu, pasi rezultoi i suksesshëm në krye të Kamzës në kategorinë e parë, qëndroi në stol me këtë ekip edhe në edicionin e Superiores, duke ndërtuar ekipin dhe vijuar punën ende në këtë ekip. Tregues suksesi për të tria skuadrat, Skënderbeun, Flamurtarin dhe Kamzën.