Kjo do të jetë ndeshja më tërheqëse e javës së 30-të të kampionatit spanjoll. Të dy këto ekipe do të kenë një sy në çerekfinalet e Champions League, që do të kthehet mesjavën e ardhshme. Duke parë se katalanasit e kanë hipotekuar titullin dhe bardhekuqtë që luftojnë për një vend në Europa League, ka shumë mundësi që dy trajnerët të përdorin një rotacion të gjerë.
Skuadra e Montella-s ka bërë një paraqitje shumë të mirë në Champions, por e njëjta gjë nuk mund të thuhet për ecurinë e tyre në kampionat. Në fakt, ata do të paraqiten në takimin e kësaj të shtune pas dy humbjesh radhazi të pësuara në La Liga. Ata kanë pësuar 8 humbje në 15 ndeshjet e fundit të kampionatit, një ecuri që bie në kontrast me paraqitjet e mira të bëra në Europë. Për më tepër, Sevilla ka fituar vetëm 2 nga 7 ndeshjet e fundit të kampionatit që ka luajtur në shtëpi.
Kjo statistikë duhet ta bëjë të ndihet mirë Barcelona-n. Leo Messi nuk ka luajtur në dy miqësoret e Argjentinës dhe pritet të jetë në fushë nga minuta e parë. Ai ka shënuar të paktën një gol në gjashtë ndeshjet e fundit të luajtura me Barcelona-n. Por katalanasit kanë bindur edhe në mbrojtje gjatë këtij sezoni, me vetëm 0.45 gola të pësuar për ndeshje.
Shifra dhe Fakte
– Barcelona ka fituar 5 ndeshjet e fundit të kampionatit kundër Sevilla dhe 4 nga 6 takimet e fundit të luajtur në “Sanchez Pizjuan”.
– Sevilla ka fituar vetëm 1 nga 21 ndeshjet e fundit që ka luajtur kundër Barcelona-s në La Liga dhe nuk ka pësuar gol vetëm në një nga këto takime.
– Vendasit kanë pësuar të paktën 1 gol në 14 ndeshjet e fundit të kampionatit që kanë luajtur në shtëpi kundër Barcelona-s.
– Barcelona nuk ka pësuar asnjë humbje në 36 ndeshjet e fundit të La Liga-s, vetëm dy larg rekordit të vendosur nga Real Sociedad në sezonin 1979/80.
– Sevilla, bashkë me Atletico Madrid, është ekipi ndaj të cilit Messi ka shënuar më shumë (23), por vetëm tetë nga këto gola kanë ardhur në “Sanchez Pizjuan”.