“Marquez ka gabuar dhe kërkoi falje, shpresojmë që të mos e bëjë më. Por, nuk do të jetë i skualifikuar, u fut dje në garë”. Giacomo Agostini, piloti më i titulluar në historinë botërore të motorëve (15 tituj), mbron spanjollin e Honda-s, i cili dje pati një incident me Valentino Rossi-n në Argjentinë.
“Nëse bëjmë skualifikime çdo herë, besoj se nuk do të ketë më garë”, janë fjalët e Agostini-t në “Tutti convocati” në “Radio 24”. “Kjo vlen për të gjithë: të mendojmë për Iannone-n, i cili hodhi përtokë Dovizioso-n dy vite më parë, atëherë ishte i skualifikuar, por kështu nuk mund të garojë më askush”, shton piloti më i titulluar në histori.
“Nuk është e vërtetë ajo që thotë Rossi se Marquez pengon pilotët me këmbë. Tashmë janë të gjithë pak nervoz dhe po e ekzagjerojnë të tërë. Ajo që ndodhi dje mes Rossi-t dhe Marquez u ka ndodhur të gjithëve, më ka ndodhur mua, i ka ndodhur Valentino Rossi-t, ndodh përherë në garë, i ka ndodhur edhe Zarco-s që nxori jashtë Pedrosa-n. Mbaj mend se kur garoja, mbi të gjitha në Angli, kur frenoja më kalonin katër, një lartë, një poshtë, një majtas e një djathtas. Ndodhet përherë kështu, natyrisht është e drejtë që të kesh respekt, është përherë e drejtë që të mos i hedhësh poshtë njerëzit”.
“Falja që kërkoi Marquez? Janë momente të vështira, pa përfunduar garën e ke adrenalinën 100. Ndoshta do të ishte e mirë që të prisnim një çerek ore, 20 minuta më shumë, ndoshta qetësoheshin ujërat, por kjo nuk ndodhi ndaj e kritikoj dhe vetë”.
Në “Virgin Radio” më pas ai tha veçanërisht për Marquez se bëri një gabim akoma më shumë strategjik: “U tregua idiot, ia them si mik. Po i menaxhonte të gjithë, mund edhe të priste kthesën e duhur që ndoshta të përgatitej më mirë për parakalimin, ndërsa ai mendoi që të qëndronte brenda por nuk ia doli. Nuk dua ta mbroj, por duhet të shohim dhe situatën”.
