Trajneri i Vllaznisë, Ernest Gjoka, foli pas fitores me Laçin. Numri një i stolit shkodran nuk pranon që skuadra e tij mund të marrë frymë tani, pasi ka dhe shumë finale përpara. Takimin e sotëm e konsideron si mjaft pozitiv, pasi ekipi kishte nevojë për këtë fitore. Gjoka e pranon se dalja me karton të kuq e Sefgjinit e ndihmoi goxha ekipin e tij, pasi kishte më shumë forca përpara. Barazimi në Durrës tregon se kampionati është shumë i fortë dhe skuadrat duhet të vuajnë për të shpëtuar. Vllaznia ka një ndeshje shumë të vështirë përpara me Flamurtarin në transfertë pastaj pret Kamzën për finalen e sezonit.
Fitorja – “Vuajtëm për të marrë fitoren, por fatmirësiosht ja dolëm mbanë. Ekipi luajti mirë në pjesën e parë, por nuk u paraqit si duhet në pjesën e dytë. Na vjen mirë që morëm fitoren, pasi çdo pikë vlen shumë për ne dhe sidomos momentin që ndodhet Vllaznia”.
Orelesi – “Ai mund të ikë ose jo, nuk i dihet. Di që klubi i ka rinovuar lejen e qëndrimit për 2 vite. Askush nuk e di se çfarë ndodh në fund të majit. Ne kishim shumë lojtarë me kartonë të verdhë. Berishën, Orelesin, Likën, Krymin dhe nuk donim t’i rrezikonim të gjithë, pasi luajmë kundër Flamurtarit. E lamë në stol afrikanin, pasi na duhet një lojtar që i bën të dy pozicionet si në mbrojtje dhe si në mesfushë. Nxorëm shpejt dhe krymin nga loja për të provuar gjithçka nga gjithçka”.
Barazimi – “Lufta do të jetë shumë e madhe deri në fund. Duhet të marrim pikët tona deri në fund. Çdo ndeshje do të jetë e fortë dhe duhet të bëjmë llogaritë për të marrë pikët tona. Rivalët? Duhet të shohim punën tonë”.
Flamurtari – “Java e ardhshme shumë e rëndësishme për ekipin tonë dhe një takim shumë i vështirë për ne. Momentalisht ne na intereson dhe gjysmë pike, jo më vetëm një pikë”.
Mziu – “Kemi fituar një ndeshje me mund, djersë dhe sakrificë. Për pjesën tjetër nuk është puna ime të merrem me këto gjëra”.
Përplasja – Gjoka duket se nuk ka shumë dashamirësi me gazetarët lokalë. Ai u përplas dhe ditën e sotme me një nga ata, pavarësisht se nuk la intervistën, pati një debat të lehtë. Një nga gazetarët e pyeti trajnerin e Vllaznisë nëse do të ishte i kënaqur me 1 pikë. Numri një i stolit iu përgjigj: “A do të ishe i kënaqur ti? Ti e ke treguar sa e do Vllazninë, pasi në momente të vështira i ke dalë kundër. Ti dhe portali yt”, -iu shpreh Gjoka. Gazetari nuk e zgjati dhe u mbyll thjesht me një: “Mendimi yt”.
Gjoka: Fitore e rëndësishme, por shpërdoruam shumë
