Harry Kane pritej të kalonte një periudhë të konsiderueshme mënjanë, larg fushave të blerta, kur pësoi një dëmtim të kyçit, në Bournemouth, katër javë më parë. Por, sulmuesi i Anglisë u kthye në veprim si zëvendësues, gjatë pjesës së dytë të ndeshjes së fituar 3-1, të dielën e kaluar, ndaj Chelsea, dhe ndihet shumë mirë përpara sfidës së ditës së nesërme, kundër një kundërshtari, të cilit i ka shënuar tetë herë në katër përballjet e mëparshme.
“Ai është në rregull, pasi ka luajtur pothuajse 20 minuta kundër Chelsea. Këtë javë ishte mjaft mirë, po punon shumë, – tha trajneri i Tottenham, Mauricio Pochettino, në një konferencë për shtyp para ndeshjes. – Ne duhet ta shohim atë në seancën e fundit të trajnimit, por po bën shumë mirë. Natyrisht, Kane është i uritur për të shënuar gola”.
Tottenham nuk kishte fituar një derbi në fushën e “Stamford Bridge” që nga shkurti 1990, ndaj rëndësia e triumfit ndaj Chelsea është e madhe për Pochettino. “Ishte fantastike në momentin që arritëm fitoren, – shtoi trajneri argjentinas. – Sidoqoftë, një ditë më pas gjithçka zhduket dhe ju duhet të jeni të fokusuar te ndeshja e radhës, që për ne ka emrin e Stoke, e cila do të jetë shumë e vështirë. Do të jetë një betejë e madhe, sepse kundërshtari luan për mbijetesë. Por, ishte mirë ta mposhtnim Chelsea.
Eshtë gjithmonë mirë të fitosh një derbi, aq më tepër pas 28 vjetësh. Prandaj, tifozët tanë e shijuan shumë fitoren në “Stamford Bridge”. Ne duam ta përfundojmë kampionatin sa më lart të jetë e mundur. Jemi në një pozicion të mirë në renditje, por ende ka shumë lojëra për t’u luajtur. Nëse përfundojmë të tretët, do të ishte më mirë se të katërtit”.
