Luftëtari mori tri pikë në shtëpi, duke treguar edhe njëherë që është rivali kryesor për të dalë në Europë. Madje, me këtë fitore, bluzinjtë shkëputen minimalisht 4 pikë nga Partizani, skuadra më e afërt që e ndjek në tabelën e renditjes.
Trajneri Hasan Lika pas takimit, të cilin e fitoi falë dy golave të Abazajt në pjesën e parë, pas ndeshjes theksoi se këto tri pikë vijnë falë punës së bërë në ekip. Ndërkohë që ndeshja e radhës nuk do të jetë e lehtë për ekipin gjirokastrite, pasi do të kenë përballë Kamzën në transfertë, skuadër që do pikë për të mbijetuar në elitën e futbollit shqiptar.
Fitorja – “Kemi entuziazëm sipas lojërave dhe rezultateve. Kemi ardhur në momentin që të luftojmë për Kupat e Evropës. Shpresojmë të vazhdojmë me këtë rrugë. Kemi ndeshje të vështira dhe shpresojmë të vazhdojmë në këtë mënyrë”.
Goli i dytë – “Ne ishim përgatitur për një skemë tjetër, por Abazaj të çudit me këto gola dhe ishte i pabesueshme me atë gol. Ka cilësi të mira, përveç Bregut po stërvitet dhe Abazaj me goditjet standarde. I shtohet repertorit të shënimit të golave me goditje standarde”.
Loja – “Rezultati mund të shkonte dhe më thellë si pasojë e lojës dhe rasteve që kishim. E kapëm disa herë kundërshtarit me kundërsulm. I dhamë pak hapësira kundërshtarit dhe e dinim se kemi lojtarë që luajnë në hapësira. Skuadra kërkoi me ngulm të fitonte. Morëm një fitore të vuajtur, pasi kundërshtari zhvilloi një ndeshje të mirë. Nuk e mbyllëm ndeshjen me gol të 3-të dhe rrezikuam”.
Vendi i dytë – “Vendin e dytë po na e fusni ju ndërmend. Ne kemi luftuar për t’iu larguar rënies nga Kategoria dhe tashmë jemi afruar për zonën e Evropës. Objektivi ynë është të marrim pjesë në Evropë. Vendi i dytë? Jo i pamundur, por i vështirë më duket me Kukësin. Duhet të marrim të gjitha ndeshjet një nga një”.
Goditjet me kokë – “Kur një skuadër ka të fortë lojën e ajrit ke vështirësi, pasi Flamurtari ka më shumë shtatlartësi. Gabimi ynë është që mos i lejonim të kromonin. Sulmuesit nuk duhet të kishin lejuar kundërshtarët e tyre të kromonin. Ne duhej të kishim shënuar golin e tretë”.
Aventura juaj më e mirë – “Pjesë e një ecurie pozitive së bashku me drejtuesit dhe lojtarët. Nuk mund të them më e mira”.
Mbështetja e tifozëve – “Këta janë tifozët e rinj të Gjirokastrës. Ne nuk na ka munguar përkrahja e tifozerisë. I kemi pasur pranë. Ky është fenomen që ndodh, por në ndeshjen e sotme, tifozët tanë na kanë përkrahur. Gjej rastin që ti falënderoj”.