Edhe pse nuk ka ende një datë zyrtare se kur do të rikthehet në kafaz, Conor McGregor ka konfirmuar se së shpejti do të duelojë në sportin e tij të preferuar të arteve marciale mikse. Kohët e fundit, kampioni irlandez ka patur disa konflikte si me UFC-në ashtu dhe me drejtësinë, pas incidenteve të krijuara para eventit të UFC-223.
Ndërkohë që nuk duelon në kafaz për më shumë se 16 muaj dhe, për pasojë, i ka dorëzuar të dy titujt kampionë bote që ka patur. Por “Notorius” pritet të rikthehet këtë vit dhe trajneri i tij Owen Roddy, në një intervistë për mediat tha se të gjithëve u mungon një personazh dhe kampion si Conor McGregor.
“Rikthimi i tij në kafaz do të jetë ngjarja më e madhe e UFC-së për këtë vit. Ai mpo stërvitet dhe duket në formë të shkëlqyer. Ne bisedojmë gjithnjë për rikthimin e tij dhe ai mezi po e pret këtë moment”, tha Roddy, që më tej shtoi: “Për mua, sa më shpejt rikthehet aq më mirë është, pasi UFC-së i mungon një kampion si Conor. Madje të gjithëve u mungon, pasi ekstravaganca e tij, sjelljet e tij, duelet e tij kanë magjepsur të gjithë. Nuk ka një të dytë si ai në botë. Ndaj dhe njerëzit mezi presin ta shohin sërish në kafaz”, u shpreh Owen Roddy. Ndër emrat e rivalëve që përflitet se mund të duelojë irlandezi janë Khabib Nurmagomedov, nate diaz, Max Holloway dhe Tyron Woodley.
