Konfirmim publik nga klubi në mbështetje të Klevis Dalipit por një trajner në fund të fundit varet gjithmonë nga rezultatet, dhe pas dy disfatave radhazi edhe pse të pësuara në mënyra shumë të ndryshme për Partizanin vjen takimi i duhur për të ndryshuar kurs duke ju kthyer serisë së rezultateve pozitive, aq të nevojshme në realizimin e objektivit për të shkuar në kompeticionet Europiane.
Fundjava e ardhshme ofron përballjen me Lushnjën e rënë matematikisht nga Kategoria dhe që nuk fiton asnjë pikë prej 11 ndeshjesh, që nga mesi i shkurtit të kaluar kur barazonte me Luftëtarin. Për Partizanin skuadra lagunare mund të konsiderohet vitamina perfekte për të marrë pikët maksimale dhe qetësinë e nevojshme pse ju duke shpresuar edhe në hapat falsë të rivalëve për Europën, duke qenë se Laçi shkon në Shkodër përballë një Vllaznie që e shikon këtë sfidë si një finale mbijetese, ndërkohë që Luftëtari dhe Flamurtari vihen kundër në një përballje direkte.
Ndaj Lushnjës të kuqtë kanë shënuar edhe fitoren më të thellë sezonale këtë sezon, një 6-0 në Selman Stërmasi, takim ku vinin në një situatë thuajse identike në fazën e tretë, pasi ishin mundur me përmbysje nga Kukësi dhe më pas edhe nga Skënderbeu në një tjetër përballje të pafat për të kuqtë ku vendosi autogoli i Gojkovic. Edhe këtë herë sfida me vendin e klasifikimit është një asist absolutisht për të mos u shpërduar, pikë kthesa për të rinisur sic duhet sprintin final drejt Europës.
