Në prag të garës së Çmimit të Madh të Argjentinës në Moto GP, situata te motori italian Ducati nuk është aspak e mirë. Deklarata e dhënë nga piloti spanjoll Jorge Lorenzo në mediat e vendit të tij në përfundim të provave të lira, duke akuzuar shokun e skuadrës Andrea Dovizioso, ka bërë që tensioni të jetë i lartë. “Gjatë gjithë karrierës, Dovizioso është përpjekur që të godasë moralin tim, gjë të cilën vazhdon ta bëjë edhe tani që jemi në të njëjtën skuadër”, tha Lorenzo.
Më tej, spanjolli tha: “Kjo situatë nuk është e re për mua. Kjo ëhstë marrëdhënia që ai ka me shtypin përmes meje. Megjithatë, është një djalosh i qetë dhe kemi një marrëdhënie të qetë mes nesh”, tha Lorenzo, por këto fjalë nuk i kanë pëlqyer aspak drejtuesve të motorit italian. Duket se këto polemika kanë lindur pas garës së Katarit, ku Dovizioso fitoi dhe në lidhje me faktin se përse motori nuk funksionon me Lorenzo, u shpreh: “Unë e di arsyen, por nuk e them”.
Pra, kanë lindur shkëndijat e para mes Lorenzo dhe Dovizioso, që vijnë në një moment të mirë për motorin Ducati, që fitoi garën e parë sezonale, por në Argjentinë, në përfundim të provave të lira, motori italian u rendit në vendet 15 e 16. Ndoshta polemikat dhe situata e krijuar kanë ndikuar në këtë paraqitje të Ducatit në Argjentinë.
