Ish-boksieri Oscar De La Hoya, tashmë në detyrën e menaxherit dhe promotorit në këtë sport, ka deklaruar sot se meksikani Saul “Canelo” Alvarez do të rikthehet në ring në shtator ose dhjetor. Ai është pezulluar 6 muaj nga komisioni i sportit në Nevada pas skandalit doping dhe pezullimi i përfundon në shtator. Ndaj De La Hoya synon që ta ngjisë në ring “nxënësin” e tij menjëherë pas pezullimit, pse jo në një duel ndaj Gennady Golovkin. Këta dy boksierë duhej të zhvillonin revanshin sot në mbrëmje, por Alvarez u tërhoq pas dopingut dhe më pas u pezullua.
De La Hoya, sot tha: “Pezullimi që i dhanë Canelo ishte qesharak, madje m’u duk se në këtë vendim të komisionit ka ndikuar Golovkin, që kishte frikë mos e humbiste revanshin. Gjithsesi, ne jemi gati për ta zhvilluar revanshin kurdoherë që kazaku të dëshirojë. Edhe Canelo dëshiron të rikthehet në ring sa më shpejt që të jetë e mundur. Në shtator, menjëherë pas pezullimit ose në dhjetor. Edhe pse është pezulluar, ne nuk e kemi ndërprerë stërvitjen, ndërkohë që tani po rikuperon pas operacionit dhe do të jemi gati për rikthimin pas përfundimit të pezullimit”, u shpreh De La Hoya.
