Presidenti i Racing Club, Victor Blanco, ka konfirmuar transferimin e sulmuesit të ri Lautaro Martinez tek skuadra e Interit. Drejtuesi më i lartë i klubit argjentinas, është shprehur se nuk dëshiron të krijohen aludime të kota rreth së ardhmes së 20-vjeçarit, i cili konsiderohet si një nga sulmuesit më të mirë në qarkullim.
Blanco ka konfirmuar se marrëveshja mes klubeve është arritur për shifrën e 25 milionë eurove dhe se Racing gëzon të drejtën e përfitimit të 10 përqindëshit, nëse sulmuesi shitet në një klub tjetër. Gjithashtu numri 1 i Racing ka shtuar se klubi do t’i kërkojë Interit që ta mbajnë sulmuesin deri në dhjetor, por gjithçka sipas tij varet edhe nga dëshira e 20-vjeçarit.
