Quhet Bledar Marashi dhe hapat e parë në futboll i ka hedhur te moshat në Laç, për të kaluar më pas te Shkëndija e Tiranës. U rikthye sërish në vendlindje dhe pati mundësinë të luante në Superiore me kurbinasit. Sulmuesi 27-vjeçar e ka shkruar emrin në historinë e klubit kurbinas, pasi ka shënuar golin e parë në kupat e Evropës me skuadrën e Laçit. Në korrik të vitit 2010 i realizonte bjellorusëve të Dnepr Mogilev në stadiumin “Niko Dovana”. Ishte pjesëmarrja e parë e bardhezinjve në kompeticionet evropiane.
Marashi me Silvio Cavric kur ishin pjesë e Laçit
Nga atëherë kanë kaluar disa vite dhe tanimë Marashi ndodhet në Shtetet e Bashkuara të Amerikës. Sulmuesi i është bashkëngjitur skuadrës së Cedar Star Academy dhe para disa ditësh ka shënuar tre gola në fitoren 6-1 të skuadrës së tij. Por te Cedar janë disa shqiptarët, sikurse edhe shihet në listën e këtij ekipi që garon në Cosmopolitan Soccer League. Marashi po provon të zërë një vend në ekipin e parë të Cedar, pasi aktualisht aktivizohet me rezervat.
SHQIPTARËT E CEDAR STARS ACADEMY RESERVE
Milot Berisha, Valon Berisha, Roberto Dashi, Bujar Gjata, Danjel Hasaj, Bledar Marashi, Florent Pireva, Bashkim Saiti, Leutrim Saiti, Shpëtim Shehu
KARRIERA – Me Laçin në elitë Marashi ka luajtur në 55 ndeshje dhe ka shënuar 3 gola, për të kaluar më pas tek ekipi i Mamurrasit në Kategorinë e Parë. Sulmuesi aty shënoi 8 gola dhe më pas i bëri një ofertë Besëlidhja dhe e pranoi. Me lezhjanët është aktivizuar në tre sezone dhe në verë e mbylli me ta, duke u larguar drejt SHBA-ve. Në Lezhë Marashi luajti më i tërhequr, duke bërë mesfushorin qendror. Në tre sezone ai gjeti 10 herë rrugën e rrjetës dhe ishte një nga lojtarët më të rëndësishëm të ekipit, duke kontribuar vjet që ta kualifikoheshin deri në gjysmëfinale të Kupës së Shqipërise.
