Juventus përgatit kundërpërgjigjen ndaj Napoli-t, që u përforcua duke marrë Carlo Ancelotti-n në stol. Sipas “Corriere dello Sport”, klubi bardhezi është gati të shpenzojë 225 milionë euro në merkaton e verës.
Pas Caldara dhe Spinazzola, tre blerjet e ardhshme do të jenë Emre Can (kosto zero), Matteo Darmian (15 milionë) dhe Mattia Perin (10 milionë). Për të kompletuar mbrojtjen, në rast se largohet Benatia, objektivi i bardhezinjve është Jose Gimenez, që ka një klauzolë prej 60 milionë eurosh.
Në mesfushë, përveç Emre Can, po mendohet të merret edhe Mateo Kovacic, i cili vlerësohet 40 milionë euro nga Real Madrid. Alternativat janë Pellegrini dhe Cristante, me ëndrrat Milinkovic-Savic, Verratti dhe Pogba.
Në sulm pritet të shpenzohen 40 milionë euro për të blerë përfundimisht Douglas Costa, ndërsa objektivi i vërtetë është Alvaro Morata, i cili kushton 60 milionë euro.
