Do të nisin nesër në mëngjes ndeshjet finale të play off-it në NBA, ku të parët do të zbresin në fushë dy ekipet finaliste në Konferencën e Lindjes, Boston dhe Cleveland. Kjo e fundit është kampione në fuqi në këtë kah të NBA-së dhe po kalon një moment të mirë në këtë fazë të play off-it, por ndryshe nga vitet e fundit nuk ka në favor faktorin fushë. 4 nga 7 finalet e planifikuara do të luhen në fushën e Celtics, që synon të rikthehet protagonist në NBA, si dikur.
Më datën 15 maj do të çelin siparin edhe finalet e Konferencës së Perëndimit, ku përballë njëra-tjetrës do të jenë skuadrat e Houston dhe Golden State. Ekipi teksan do të luajë më shumë ndeshje në fushën e tij, por përballë janë kampionët e NBA-së të Warriors, që pas rikthimit të Stephen Curry (pas dëmtimit) janë një skuadër e frikshme. Golden State do të kërkojnë të mbrojnë titullin kampion, ndaj pritet një finale e fortë dhe me rivalitet mes dy finalisteve.
NBA – Konferenca e Lindjes (finale play off)
Boston Celtics – Cleveland Cavaliers
NBA – Konferenca e Perëndimit (finale play off)
Houston Rockets – Golden State Warriors
