Parma arriti të rikthehet në Serinë A pas 3 sezonesh mungesë, gjatë të cilave iu desh të ngjitet nga Seria D, ku shkoi për shkak të falimentit, në ligën e më të mirëve. Drejtori Sportiv i skuadrës verdheblu konfirmoi trajnerin D’Averssa edhe për sezonin e ardhshëm, ndërsa foli edhe për synimet e skuadrës, që fillimisht do të kërkojë të mbetet në Serinë A.
“Roberto D’Averssa do të mbetet trajneri ynë edhe në Serinë A, pasi besojmë plotësisht te puna dhe aftësitë e tij. Do të kërkojmë të afrojmë ndonjë lojtar me eksperiencë, për pa e tepruar me shpenzimet. Synimi ynë është që të garantojmë sa më shpejt qëndrimin në Serinë A dhe vetëm nga vera e 2019-ës do të mendojmë për t’u ngjitur në gjysmën e parë të tabelës”, deklaroi Faggiano.
Drejtori Sportiv i emilianëve pranoi se tifozëria e Parmës ka pritshmëri të tjera, por theksoi se vendimet duhen marrë me mendje dhe jo me zemër, pasi rrezikohet i njëjti kolaps financiar, nëse bëhen hapa të gabuar.
