Anderlecht në Belgjikë siguroi shërbimet e Kristal Abazajt në muajin prill. Sulmuesi nënshkroi një kontratë trevjeçare dhe do të transferohet nga Skënderbeu më 1 korrik, ekip që e kishte marrë përsipër nga Luftëtari në merkaton e dimrit. Pa luajtur asnjë ndeshje për Skënderbeun, 21-vjeçari Abazaj do të luajë në Belgjikë. Kjo gjithashtu mund të ndodhë edhe me Dejvi Bregun. Ky 22 vjeçar që aktivizohet te Luftëtari nënshkroi një kontratë paraprake te Skënderbeu në dimër, por destinacioni i tij natyrisht që është në Evropë.
Ish-lojtari i Shpresave të Shqipërisë më parë ka marrë ofertë nga Austria, ku ai ka lënë vetë të nënkuptohet gjithçka: “Është e vërtetë se Skënderbeu ka blerë të drejtat e mia të transferimit, por kam oferta të tjera dhe do të shohim çfarë do të ndodhë në të ardhmen. Ka edhe interesim nga klubet evropiane, kështu që ne do të shohim se çfarë është më e mira për mua dhe Skënderbeun”, kanë qenë këto fjalët e Bregut para pak ditësh ku ka sqaruar situatën e tij. Është e mundshme që interesi austriak ka ardhur nga SV Mattersburg. Në fund të fundit, ky klub ka bërë një ofertë për Bregun verën e kaluar.
Nga Bundesliga austriake mësohet se i ofruan 100 mijë euro plus 50% të kartonit në rast se shitej në një tjetër ekip, por shtatshkurtri Bregu dhe klubi gjirokastrit nuk kanë pranuar që ai të kalojë nën udhëheqjen e Rote Teufel. Më parë, Luftëtari kishte shpërdoruar edhe një ofertë nga Belgjika. Të mos harrojmë, të mërkurën në stadiumin Luftëtari ishin të pranishëm disa zbulues talentesh të cilët e piketuan vlonjatin në listën e tyre. Normalisht, duke iu referuar mediave të huaja, Bregu së shpejti mund të ketë të ardhme Europiane. Destinacioni i mundshëm? Holanda.
